From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ಮೆರ್ರಿ ಕ್ರಿಸ್‌ಮಸ್, ಡೆಡಿ
Tuesday, December 22, 2015
ಸರ್‍ವ್, ಪಾ೦ಚ್-ಖಿಣಾ೦ ಭಿತರ್ ಘಡೊನ್ ಗೆಲೆ೦.
ಆಪ್ಲ್ಯಾ ಕೊ೦ಪ್ರಾನ್, ವಜ್ರಾ೦ಚೊ ನೆಕ್ಲೆಸ್ ಆಸ್ಚೆ೦ ತೆ೦ ಆರ್‍ಶ್ಯಾಚೆ೦ ಪೆಟುಲ್ ತಾಣೆ ಫುಟಯ್ಲೆ೦ ಆನಿ ತೊ ನೆಕ್ಲೆಸ್ ಘೆವ್ನ್ ತ್ಯಾ ಶೊಪಾ೦ತ್ಲ್ಯಾ ಗಡ್ದೆ ಮಧ್ಲ್ಯಾನ್ ಧಾ೦ವ್ತಾ೦ ಮ್ಹಣ್ತಾನಾ ಎಕ್ ಬೊಬಾಟ್ ಉಟ್ಲಿ. ಚೋರ್, ಚೋರ್! ಸಾ೦ತಾಕ್ಲೊಸಾಚ್ಯಾ ವೆಸಾರ್ ಆಯಿಲ್ಲ್ಯಾನ್ ನೆಕ್ಲೆಸ್ ಚೊರ್‍ಲೊ! ಹಿ ಬೊಬಾಟ್ ಭೋವ್‌ಶಾ ಮ್ಹಾಲಕಾಚಿ ಆಕೇರ್ ಜಾ೦ವ್ಚ್ಯಾ ಭಿತರ್ ತೊ ಶೊಪಾಚ್ಯಾ ದಾರ್‍ವಟ್ಯಾ ಲಾಗಿ೦ ಪಾವ್‌ಲ್ಲೊ. ಹಾತಾ೦ತ್ ನೆಕ್ಲೆಸ್, ಆ೦ಗಾರ್ ಸಾ೦ತಾಕ್ಲೊಸಾಚಿ ತಾ೦ಬ್ಡಿ ಧೊವಿ ಮುಸ್ತಾಯ್ಕಿ, ಮೆಕ್‌ಅಪ್ ಆನಿ ತೊಪಿ. ಖಾ೦ದಾರ್ ಇನಾಮಾ೦ಚೆ೦ ಪೊತೆ೦ ಮಾತ್ರ್ ನಾತ್‌ಲ್ಲೆ೦. ಇತ್ಲೊಚ್ ಫರಕ್. ವಜ್ರಾ೦ಚೊ ನೆಕ್ಲೆಸ್ ಲಿಪ೦ವ್ಕ್ ಪೊತ್ಯಾಚಿ ಗರ್‍ಜ್ ನಾತ್‌ಲ್ಲಿ.
ಸರ್‍ವ್, ಪಾ೦ಚ್ - ಸ ಖಿಣಾ೦ ಭಿತರ್ ಘಡೊನ್ ಗೆಲೆ೦.
ತೊ, ಶೊಪಾಚ್ಯಾ ದಾರ್‍ವಟ್ಯಾಲಾಗಿ೦ ಪಾವ್ತಾನಾ ಸಮವಸ್ತ್ರಾರ್ ಆಸ್‌ಲ್ಲೊ ರಾಕ್ವಲಿ ಎಕಾಚ್‌ಫರಾ ಉದೆಲೊ; ನಿಮಾಣ್ಯಾ ಘಡಿಯೆ ಕ್ರಿಸ್‌ಮಸ್ ಶೊಪಿ೦ಗ್ ಕರು೦ಕ್ ಆಯಿಲ್ಲ್ಯಾ೦ಕ್ ತಾಣೆ ಹುಕುಮ್ ದಿಲಿ: ಶೊಪಾಚೆ ಧರ್‍ಣಿಚೆರ್ ವೊಮ್ತೆ ಪಡಾ ಆನಿ ಆಪ್ಲಿ ಪಿಸ್ತುಲ್ ಭಾಯ್ರ್ ಕಾಡ್ಲಿ. ಶೊಪಾ೦ತ್ ಕಿ೦ಕ್ರಾಟ್ಯೊ ಉಟ್ಲ್ಯೊ, ಕ೦ರ್‍ಡೆ ಉಸಳ್ಳೆ, ಆಭರಣಾ೦ ಆನಿ ನಗ್ ಶಿ೦ಪ್ಡೊನ್ ಗೆಲೆ. ಶೊಪಾ೦ತ್ಲೆ ಖರೀದ್ಗಾರ್ ವೊಮ್ತೆ ನಿದ್ತಾನಾ ತೊ ನಿಮಾಣ್ಯಾ ಮೆಟಾರ್ ಆಸ್‌ಲ್ಲೊ
ಪುಣ್, ಸರ್‍ವ್ ಪಾ೦ಚ್ - ಸ ಖಿಣಾ೦ ಭಿತರ್ ಘಡೊನ್ ಗೆಲೆ೦.
ತಾಪ್ಲೊಲೊ ಲೊ೦ಕ್ಡಾ ಸರಳ್ ಆಪ್ಲ್ಯಾ ಉಜ್ವ್ಯಾ ಜಾ೦ಗ್ಳಾ೦ತ್ ರಿಗ್‌ಲ್ಲೆಪರಿ೦ ತಾಕಾ ಭೊಗ್ಲ್ಯಾ ಉಪ್ರಾ೦ತ್ ಫಾರಾಚೊ ಆವಾಜ್ ತಾಕಾ ಆಯ್ಕಾಲೊ. ದುಕಿಚೊ ಧು೦ವರ್ ತಾಚ್ಯಾ ನಾಕಾ ತೊ೦ಡಾ೦ತ್ಲ್ಯಾನ್ ಭಾಯ್ರ್ ಆಯ್ಲೊ ಆನಿ ತಾಚೆ೦ ಮಾತೆ೦ ದೆವಾಳಾಚ್ಯಾ ಘಾ೦ಟಿ ಭಿತರ್ ಚೆಪ್‌ಲ್ಲೆಪರಿ೦ ಘುಡ್ಗುಡ್ಲೆ೦ ತರಿಪುಣ್ ತೊ ಧರ್‍ಣಿಕ್ ಶೆವ್ಟಾಲೊ ನಾ. ಫಾರಾಚೊ ಆವಾಜ್ ಆಯ್ಕಾಲ್ಲೊಚ್ ಶೊಪಾಚ್ಯಾ ಭಿತರ್ ಆನಿ ಭಾಯ್ರ್ ಆಸ್‌ಲ್ಲ್ಯಾ೦ಚೆ೦ ಸ೦ಯಮ್ ಚುಕ್ಲೆ೦ ಆನಿ ಕೊಣೆ೦ಚ್ ಚಿ೦ತಿನಾತ್‌ಲ್ಲಿ ಗಡ್ದಿ ಆನಿ ಧಾ೦ವ್ ಥ೦ಯ್‌ಸರ್ ಸುರು ಜಾಲಿ. ಜಮ್ಯಾಚೆ೦ ಶಿ೦ತಿದ್ ಭಿರಾ೦ತೆಚೆ೦ ಎಕ್ ಆಗ್ಟೆ೦ ಜಾವ್ನ್, ಸ೦ಯಮ್ ಚುಕೊನ್ ನಾಚ್ತಾಲೆ೦ ಆನಿ ಹ್ಯಾ ತಾ೦ಡ್ ವೊಡಿ೦ ಮಧೆ೦ ತೊ ಯೆಕಾಚಾಣೆ ಎಕ್ಸುರೊ ಜಾಲೊ.
ಥೊಡೆ ತಾಕಾ ಲೊಟ್ತಾಲೆ, ವೊಡ್ತಾಲೆ ಪುಣ್ ಕೊಣ್೦ಚ್ ತಾಕಾ ಆಡಾಯ್‌ನಾತ್‌ಲ್ಲೆ. ಹಾತಾಕ್ ಆಯಿಲ್ಲೊ ನೆಕ್ಲೆಸ್ ತಾಣೆ ಯೆದೊಳ್‌ಚ್ ಆಪ್ಲ್ಯಾ ದಿರುಸಾ೦ತ್ ಲಿಪಯಿಲ್ಲೊ. ಸೊಸು೦ಕ್ ನಜೊ ಜಾಲ್ಲಿ ದೂಕ್ ಉಬ್ಜ೦ವ್ಚೆ೦ ಕಸಲೆ೦ಗಿ ಎಕ್ ಯ೦ತ್ರ್ ತಾಚ್ಯಾ ಉಜ್ವ್ಯಾ ಜಾ೦ಗ್ಳಾಕ್ ಧಾಡಾಯ್ತಾಲೆ೦ ತರಿ ತೊ ಚಲ್ತಾಲೊ. ತಾಚೆ೦ ಹಾಡ್ ಮೊಡು೦ಕ್ ನಾತ್‌ಲ್ಲೆ೦. ಪಿಸ್ತುಲೆ೦ತ್ಲೊ ಗುಳೊ ತಾಚ್ಯಾ ಜಾ೦ಗ್ಳಾಚಿ ದೇಗ್ ಶಿ೦ದುನ್ ಪಾಶಾರ್ ಜಾಲ್ಲೊ ಜಾಯ್ಜೆ. ತಾಚೆ೦ ಶಿ೦ತಿದ್ ದುಕಿ ಮಧೆ೦ಯಿ ಸ್ಪಟಿಕಾಪರಿ೦ ಸ್ಪಶ್ಟ್ ಆಸ್‌ಲ್ಲೆ೦. ಆಪ್ಲ್ಯಾ ಘಾಯಾ೦ತ್ಲ್ಯಾನ್ ಜಾ೦ವ್ಚೊ ರಗ್ತಾಸ್ರಾವ್ ತಾಕಾ ಕಳಿತ್ ಜಾತಾಲೊ ಪುಣ್ ತೊ ಆಪ್ಣಾಕ್‌ಚ್ಚ್ ಸಾ೦ಗ್ತಾಲೊ....ಹಾ೦ವೆ೦ ಧಾ೦ವಾಜೆ!
ನತಾಲಾ೦ಚಿ ರಾತ್!
ಮಧ್ಯಾನೆಕ್ ಲಾಗಿ೦ ಲಾಗಿ೦ ದೇಡ್ ಘ೦ಟೊ ಬಾಕಿ ಆಸ್‌ಲ್ಲೊ. ಶಹರಾಚ್ಯಾ ಪ್ರಮುಕ್ ರಸ್ತ್ಯಾ೦ನಿ ಕಠಿಣ್ ಗಡ್ದಿ ಆಸ್‌ಲ್ಲಿ. ನಾಚಾಚಿ೦ ಸಾಲಾ೦ ಆನಿ ಬಾರ್ ಉಗ್ತೆ ಅಸ್‌ಲ್ಲೆ. ಚಡಾವತ್ ದುಖಾನಾ೦ ಬ೦ದ್ ಆಸ್‌ಲ್ಲಿ೦ ತರಿ ನತಲಾ೦ ಖಾತಿರ್‌ಚ್ ಮ್ಹಣ್ ಅಪೂರ್‍ವ್ ಇನಾಮಾ೦ ವಿಕ್ಚಿ೦ ಥೊಡಿ೦ ಶೊಪಾ೦ ಉಗ್ತಿ೦ಚ್ ಆಸ್‌ಲ್ಲಿ೦. ತ್ಯಾ ಪಯ್ಕಿ ವಜ್ರಾ೦ಚ್ಯಾ ಹಾರಾ೦ಚೆ೦ ತೆ೦ ಶೊಪ್ ಎಕ್. ಆದ್ಲ್ಯಾ ವರ್‍ಸಾಥಾವ್ನ್೦ಚ್ ತಾಣೆ ಹ್ಯಾ ಶೊಪಾಚೆರ್ ನಿಗಾ-ನದರ್ ದವ್ರಿಲ್ಲಿ. ಹಾ೦ಗಾಸರ್ ಗಡ್ದಿ ಚಡ್, ಸೆಕ್ಯುರಿಟಿ ಉಣಿ ಆನಿ ಭಿತರ್ ಆಸ್ಚೆ ನಗ್ ನಿಜಾಯ್ಕಿ ಅಪೂರ್‍ವ್. ಎಕಾ ನಗಾಚೆರ್ ದಾವ್ಲಿ ಮಾರ್‍ಲ್ಯಾರ್ ಉರ್ಲೆಲಿ ಜಿಣಿ ಪಾ೦ಯಾರ್ ಪಾ೦ಯ್ ಘಾಲುನ್ ಸಾರ್‍ಯೆತ್ ಮ್ಹಳ್ಳೊ ಅ೦ದಾಜ್ ತಾಣೆ ಕೆಲ್ಲೊ.
ಆತಾ೦ ಬಲ್ಸಾ೦ತ್ ವಜ್ರಾ೦ಚೊ ಹಾರ್, ಜಾ೦ಗ್ಳಾ೦ತ್ ಘಾಯ್ ಆನಿ ಹಾತಾ೦ನಿ ಉರ್ಲೆಲಿ ಜಿಣಿ ಘೆವ್ನ್ ತೊ ಚಲ್ತಾಲೊ. ಹ್ಯಾ ಚೊರಿಯೆಕ್ ಫಾವೊತಿ ತಯಾರಾಯ್ ತಾಣೆ ಕರು೦ಕ್ ನಾತ್‌ಲ್ಲಿ ಮ್ಹಣ್ ನ್ಹಯ್. ತಾಣೆ ಸಾ೦ತಾಕ್ಲೊಸಾಚೆ೦ ದಿರುಸ್ ವಿ೦ಚ್‌ಚ್ಯಾ೦ತ್ ಮತ್ಲಬ್ ಆಸ್‌ಲ್ಲೊ. ಚ್ಯಾರ್ ಕಾಸ್ ಕರ್‍ಚ್ಯಾ ಉದ್ದೇಶಾನ್ ಸಬಾರ್ ಪಾಪಾರಿ, ಸಾ೦ತಾಕ್ಲೊಸಾಪರಿ೦ ನೆಸುನ್ ವಾಟಾ೦ ವಾಟಾ೦ನಿ, ಶೊಪಾ-ದುಖಾನಾ೦ನಿ ಭೊ೦ವೊನ್ “ಮೆರ್ರಿ ಕ್ರಿಸ್‌ಮಸ್, ಮೆರ್ರಿ ಕ್ರಿಸ್‌ಮಸ್ ಮ್ಹಳ್ಳೆ ಸ೦ದೇಶ್-ರೆಖಾದ್ ಪಾಟವ್ನ್ ಥೊಡೆ೦ ಪುಣಿ ಇಜ್ಮೊಲ್ ಕಮಾಯ್ತಾಲೆ. ಹಾಚ್ಯಾ ತಸಲ್ಯಾ ಧಾಕ್ಟ್ಯಾ-ಸಾದ್ಯಾ ಚೊರಾ೦ಕ್ ಹೆ೦ ನಕ್ಲಿ ನೆಸಪ್ ಭಾರಿಚ್ಚ್ ಉಪ್ಕಾರಾ೦ಚೆ ಪಡ್ಟಾಲೆ೦--ಚುಕೊನ್ ಘೆ೦ವ್ಕ್, ಮುಕಮಳ್ ಲಿಪ೦ವ್ಕ್. ಪುಣ್ ಹ್ಯಾಪಾವ್ಟಿ೦ ಹ್ಯಾ ಧಾಕ್ಟ್ಯಾ-ಸಾದ್ಯಾ ಚೊರಾನ್ ಬರ್‍ಯಾಚ್ ಫೆರ್‍ಗ್ಯಾಚೆರ್ ದಾವ್ಲಿ ಮಾರ್‌ಲ್ಲಿ.
ಶಹರಾಚ್ಯಾ ಸರ್‍ವ್ ರಸ್ತ್ಯಾ೦ನಿ ಆನಿ ಗಲ್ಲ್ಯಾ೦ನಿ೦ ನತಾಲಾ೦ಚೊ ಸ೦ಭ್ರಮ್ ಉಟೊನ್ ದಿಸ್ತಾಲೊ; ನೆಕೆತ್ರಾ೦, ಝಿಜ್‌ಭಿಗ್ ಝಿಲ್ಪಾ೦ ಆನಿ ಗುಡ್ ಲಾ೦ಪ್ಯಾ೦ವ್ ಪ್ರಕಾಸ್ತಾಲೆ. ಖ೦ಯ್‌ತರಿ ಗರ್‍ನಾಳಿ೦ಚಿ ಸಾ೦ಕಳ್ ಫುಟ್ತಾಲಿ; ದುರುಸುಬಾಣಾ೦ ಆಗಸಾಕ್ ಉಮೆ ದಿತಾಲಿ೦. ಫರಾರಿ ತೊ ಜಾಲ್ಲೊ, ಗಡ್ದೆ೦ತ್ ಮಿಸ್ಳೊನ್ ಫಕೀರ್ ಸಾ೦ತಾಕ್ಲೊಸ್ ತೊ ಜಾಲ್ಲೊ ಪುಣ್ ಜಾ೦ಗ್ಳಾಕ್ ಜಾಲ್ಲೊ ತೊ ಘಾಯ್ ಘೆವ್ನ್ ಆಪುಣ್ ಚಡ್ ಪಯ್ಸ್ ವಚು೦ಕ್ ಸಕ್ಚೊ೦ನಾ ಮ್ಹಳ್ಳೆ೦ ತಾಕಾ ಖಚಿತ್ ಕಳಿತ್ ಜಾಲ್ಲೆ೦. ಆಸ್ಪತ್ರೆಕ್ ಗೆಲ್ಯಾರ್ ತಾಣೆ ಕಯ್ದ್ ಜಾ೦ವ್ಚೆ೦ ಖ೦ಡಿತ್ - ಯೆದೊಳ್‌ಚ್ ಸ್ಥಳೀಯ್ ರೇಡಿಯೊಚೆರ್, ಟಿ.ವಿ.ಚೆರ್ ಚೊರಿಯೆಚಿ ಖಬರ್ ಪ್ರಸಾರ್ ಜಾಲ್ಯಾ ಆಸ್ತೆಲಿಚ್ಚ್. ಆಧುನಿಕ್ ಶೆಹರ್ ತೆ೦ ಜಾ೦ತು೦ ಭದ್ರತೆಚಿ ಆನಿ ಸುಲಲಿತ್ ಜಿಣಿಯೆಚಿ ಸವ್ಲಾತಾಯ್ ಉಣಿನಾತ್‌ಲ್ಲಿ. ಪುಣ್ ಜಿಣಿಯೆ೦ತ್ ವರ್‍ಗ್ ಆನಿ ಹ೦ತ್, ಗ್ರೇಸ್ತ್ ಆನಿ ದುಬ್ಳೊ ಆಸ್ಚೆ ವರೇಗ್ ಚೊರಿ, ಲೂಟ್, ದೊ೦ಬಿ ಆನಿ ಮಾರ್‌ಫಾರ್ ಅನಿವಾರ್‍ಯ್.
ಮೆಳ್‌ಲ್ಲ್ಯಾ೦ ಪಯ್ಕಿ ಚಡ್ ಕಾಳೊಕಾ೦ತ್ ದಾಟೊನ್ ಆಸ್‌ಲ್ಲಿ ಗಲ್ಲಿ ಸೊದುನ್ ತೊ ಭಿತರ್ ಘುಸ್ಲೊ ಆನಿ ಬ೦ದ್ ಆಸ್‌ಲ್ಲ್ಯಾ ಎಕಾ ದುಖಾನಾಚ್ಯಾ ದಾರಾರ್ ಬಸ್ಲೊ. ಪ್ರಮುಕ್ ರಸ್ತ್ಯಾ ವಯ್ಲ್ಯಾನ್ ಪೊಲಿಸಾ೦ಚೆ ಎಕ್ ವ್ಯಾನ್ ಸಾಯ್ರನ್ ಮಾರಿತ್ತ್ ಪಾಶಾರ್ ಜಾಲೆ೦. ತೊ ಲಿಪೊನ್ ರಾವ್‌ಲ್ಲೆ ಗಲ್ಲೆಚ್ಯಾ ಎಕಾ ಮುಲ್ಯಾ೦ತ್ ತರ್‍ನಾಟ್ಯಾ೦ಚೊ ಎಕ್ ಪ೦ಗಡ್ ಬಿಯರ್ ಸೆವ್ತಾಲೊ. “ಮೆರ್ರಿ ಕ್ರಿಸ್‌ಮಸ್! ತಾ೦ಕಾ೦ ಪಳೆವ್ನ್ ತೊ ಮ್ಹಣಾಲೊ ಹಾತ್ ಭಿಜಾವ್ನ್. ತಾ೦ಣಿ ತಾಚೆ ಗುಮಾನ್ ಕೆಲೆ೦ ನಾ. ದಗ್ಲ್ಯಾ೦ತ್ ಸಾಸ್ಪೊನ್ ವಜ್ರಾ೦ಚೊ ಹಾರ್ ಭದ್ರ್ ಆಸಾ ಮ್ಹಣ್ ಖಚಿತ್ ಕರುನ್ ತಾಣೆ ದುಸ್ರ್ಯಾ ಬೊಲ್ಸಾ೦ತ್ಲಿ ಸಿಗ್ರೆಟ್ ಪೆಕೆಟ್ ಭಾಯ್ರ್ ಕಾಡ್ಲಿ ಆನಿ ಕಾ೦ಪೆರ್‍ಯಾ ಬೊಟಾ೦ನಿ ಎಕ್ ಸಿಗ್ರೆಟ್ ಪಟಯ್ಲಿ.
ತಾಚೆ೦ ತ್ರಾಣ್ ಖಿರೊನ್ ವೆತಾಲೆ೦. ತಾಣೆ ವಸ್ತಿ ಕರ್‍ಚೆ೦ ವಠಾರ್ ಸುಮಾರ್ ವೀಸ್ ಕಿಲೊಮೀಟರ್ ಪಯ್ಸ್ ಆಸ್‌ಲ್ಲೆ೦ ಆನಿ ನೆಸಣ್ ಬದ್ಲುನ್ ಎಕಾ ಟೆಕ್ಸೆ೦ತ್ ಘುಸ್ಯಾ೦ ಮ್ಹಳ್ಯಾರ್ ತಾಚೆಲಾಗಿ೦ ಸಾ೦ತಾಕ್ಲೊಸಾಚೆ೦ ಸೊಡ್ಲ್ಯಾರ್ ಹೆರ್ ನೆಸಣ್ ನಾತ್‌ಲ್ಲೆ೦.
ತರಿ ಪುಣ್ ತಾಚಿ ಮೋತ್ ಕಾಮ್ ಕರ್‍ತಾಲಿ. ಹೆ ರಾತಿ೦ ತಾಕಾ ಜಾಯ್ ಆಸ್‌ಲ್ಲಿ ಪ್ರಥಮ್ ಚಿಕಿತ್ಸಾ ಆನಿ ತತ್ಕಾಲಿಕ್ ಭದ್ರತಿ. ತಾಣೆ ದೊಳೆ ಘಟ್ ದಾ೦ಪ್ಲೆ ಆನಿ ತ್ಯಾ ಶೆರಾಚಿ ನಕ್ಶಾ ಆಪ್ಲ್ಯಾ ಮತಿಪಟಲಾಚೆರ್ ಹಾಡ್ಲಿ. ಭದ್ರತೆಚೆ ದೋನ್-ತೀನ್ ಜಾಗೆ ತಾಕಾ ಉಟೊನ್ ದಿಸ್ಲೆ ಆನಿ ಹ್ಯಾ ಪಯ್ಕಿ ತೆ೦ ಅನಾಥಾಶ್ರಮ್ ಫಕತ್ ಎಕ್ ಕಿಲೊಮೀಟರ್ ಪಯ್ಸ್ ಆಸ್‌ಲ್ಲೆ೦, ತೊ ಬಸುನ್ ಆಸ್‌ಲ್ಲೆ ಗಲ್ಲೆಥಾವ್ನ್. ಥೊಡ್ಯಾ ದಾನಿ ಮನ್ಶಾ೦ಚ್ಯಾ ಉದಾರ್ ಮನಾ೦ಕ್ ಲಾಗುನ್ ಥೊಡೆ ಗರೀಬ್ ಸಾ೦ತಾಕ್ಲೊಸಾಪರಿ ನೆಸ್ತಾಲೆ, ಅಸಲ್ಯಾ ಅನಾಥಾಶ್ರಮಾ೦ಕ್ ಪಾವ್ತಾಲೆ, ನತಾಲಾ೦ಚೆ ರಾತಿ೦ ತ್ಯಾ ಅನಾಥ್ ಭುರ್‍ಗ್ಯಾ೦ಕ್ ಖುಶ್ ಕರ್‍ತಾಲೆ, ಇನಾಮಾ೦ ವಾ೦ಟ್ತಾಲೆ.....ಹೊಚ್ಚ್ ಪಾತ್ರ್ ಆಪುಣ್ ಖ್ಹೆಳಾನ್ ತರ್? ಹ್ಯಾ ಸವಲಾಸ೦ಗಿ ತೊ ತಾಚಿ ದೂಕ್ ಥೊಡಿ೦ ಖಿಣಾ೦ಬರ್ ವಿಸ್ರಾಲೊ. ಪುಣ್ ಬೊಲ್ತೊಚ್ ಎಕ್ ಸಾ೦ತಾಕ್ಲೊಸ್ ಯೆದೊಳ್‌ಚ್ ಹ್ಯಾ ಅನಾಥಾಶ್ರಮಾಕ್ ಪಾವ್ಲಾ ತರ್? ಕಿತೆ೦ ಜಾಲೆ೦? ದುಸ್ರ್ಯಾ ಎಕಾ ಧರ್‍ಮಿಶ್ಟಾನ್ ಆಪ್ಲ್ಯಾಚ್ ಎಕಾ ಸಾ೦ತಾಕ್ಲೊಸಾಕ್ ಧಾಡ್‌ಲ್ಲ್ಯಾ೦ತ್ ಕಸಲಿ ಚೂಕ್ ಆಸಾ? ಧಾಡು೦ಕ್ ನಜೊ ಮ್ಹಣ್ ಆಸಾ-ವೇ ತರ್? ವೊ೦ಠಾ೦ಚೆರ್ ಎಕ್ ಮಾರ್‍ಮಿಕ್ ಹಾಸೊ ಘೆವ್ನ್ ತೊ ಉಬೊ ಜಾಲೊ. ತಾಚ್ಯಾ ದೊಳ್ಯಾ೦ ಸಾಮ್ಕಾರ್ ಕಾಜುಲೆ ಉಬ್ಲೆ. ಖೊ೦ಕ್ಲಿ ತಾಕಾ ಆಯ್ಲಿ ಆನಿ ಬೊಟಾ೦ ಮಧ್ಲಿ ಸಿಗ್ರೆಟ್ ಝಡೊನ್ ಧರ್‍ಣಿರ್ ಪಡ್ಲಿ. ಆಪ್ಲ್ಯಾ ಘಾಯಾನ್ ಫುಲಯಿಲ್ಲೆ೦ ರಗ್ತಾಳೆ೦ ಖತ್ ಸಾ೦ತಾಕ್ಲೊಸಾಚ್ಯಾ ತಾ೦ಬ್ಡ್ಯಾ ಮುಸ್ತಾಯ್ಕೆ ವಯ್ರ್ ಉಟೊನ್ ದಿಸ್ಚೆ೦ ನಾ ಮ್ಹಳ್ಳೆ ಪಾತಿಯೆಣೆನ್ ತಾಣೆ ಗಲ್ಲೆ ಭಾಯ್ರ್ ಮೆಟಾ೦ ಕಾಡ್ಲಿ೦. ಭಾಯ್ಲೆ ಶೀತಳ್ ವಾರೆ೦ ತಾಚ್ಯಾ ಮುಕಮಳಾಕ್ ಮಾರ್‍ತಾನಾ ತಾಚೆ ಥ೦ಯ್ ಥೊಡೊ ಪುಣಿ ಹುರುಪ್ ಆಯ್ಲೊ.
ತಾಣೆ ಮೆಟಾ೦ ಕಾಡ್ಲಿ೦.
ಫಕತ್ ಎಕ್ ಕಿಲೊಮೀಟರ್.
ಅನಾಥಾಶ್ರಮಾಚ್ಯಾ ಗೇಟಿ ಪರ್‍ಯಾ೦ತ್ ಚಲಲ್ಲಿ ತಿ ವಾಟ್ ತಾಚ್ಯಾ ಮತಿ೦ತ್ ಉರ್ಲಿ ನಾ. ದುಕಿಚ್ಯಾ ಧು೦ವ್ರಾನ್ ಸರ್‍ವ್ ತಿ ವಿಸ್ರಾಯ್ಲಿ. ದುಕಿಚೆ೦ ಆಮಾಲ್ ತಾಣೆ ಸೆವ್‌ಲ್ಲ್ಯಾ ಸರ್‍ವ್ ಆಮಾಲಾ೦ ಪ್ರಾಸ್ ಬಳಿಶ್ಟ್ ಜಾವ್ನಾಸ್‌ಲ್ಲೆ೦. ಲೊ೦ಕ್ಡಾಚ್ಯಾ ಸರಳಾ೦ನಿ ಕೆಲ್ಲ್ಯಾ ಗೇಟಿಲಾಗಿ೦ ತೊ ಉಬೊ ಜಾಲೊ ಆನಿ ದೊಳೆ ಪಾಫುಡ್ನ್ ತಾಣೆ ಭಿತರ್‍ಲ್ಯಾ ವಠಾರಾಚೆರ್ ದೀಶ್ಟ್ ಘಾಲಿ. ಪೊ೦ತಾರ್ ಎಕ್ ಕ್ರಿಸ್‌ಮಸ್ ಟ್ರೀ, ಲ್ಹಾನ್, ಲ್ಹಾನ್ ಭುರ್‍ಗ್ಯಾ೦ಚೊ ಎಕ್ ಪ೦ಗಡ್, ಆನಿ ತೆ೦ ಗೀತ್: ಮೊಧ್ಯಾನ್ ರಾತ್, ನಿದಾನ್ ರಾತ್...ತಾಚೆ ದೊಳೆ ಭರುನ್ ಆಯ್ಲೆ. ಧಾ೦ವ್ಲೊ ತಾಚೊ ಉಡಾಸ್ ಪಾಟಿ೦...ಮೊಧ್ಯಾನ್ ರಾತ್, ನಿದಾನ್ ರಾತ್...ಆಪ್ಲಿ ಪತಿಣ್, ಆಪ್ಲಿ ಧುವ್, ಆಪ್ಲೆ೦ ಪಿಯೊಣೆ...ಮೆರ್ರಿ ಕ್ರಿಸ್‌ಮಸ್ ಡೆಡಿ, ಮೆರ್ರಿ ಕ್ರಿಸ್‌ಮಸ್ ಡೆಡಿ. ತಾಚೆಲಾಗಿ೦ ಉತ್ರಾ೦ ನಾತ್‌ಲ್ಲಿ೦ ಕಿತ್ಯಾಕ್ ತೊ ಆಮಾಲಾ೦ತ್ ಉಪ್ಯೆತಾಲೊ. ಆತಾ೦ ತಾಚ್ಯಾ ದೊಳ್ಯಾ೦ನಿ ದುಕಾ೦ ಉದೆಲಿ೦. ಕಿತ್ಲಿ೦ ವರ್‍ಸಾ೦ ಪಾಶಾರ್ ಜಾಲ್ಲಿ೦, ಕಿತ್ಲಿಶಿ೦ ವರ್‍ಸಾ೦!
ಲೊ೦ಕ್ಡಾಚೆ ಗೇಟಿಕ್ ಉಮ್ಕಳೋನ್ ಆಸ್‌ಲ್ಲೊ ಕಾ೦ಪಿಣೆಚೊ ಹಾತಾಳೊ ತಾಣೆ ವೊಡ್ಲೊ. ಎಕ್ ಪಾವ್ಟಿ೦, ದೋನ್ ಪಾವ್ಟಿ೦, ತಿಸ್ರೆ ಪಾವ್ಟಿ೦. ಗೀತ್ ಸ್ತಬ್ದ್ ಜಾಲೆ೦. ಭುರ್‍ಗ್ಯಾಚಿ ನದರ್ ತಾಚೆರ್ ಪಡ್ಲಿ ಆನಿ ಆಯ್ಕಾಲಿ೦ ತಾಕಾ ತಿ೦ ಉಡ್ಕಾಣಿ ಉತ್ರಾ೦. “ಸಾ೦ತಾಕ್ಲೊಸ್ ಆಯ್ಲಾ ಸಿಸ್ಟರ್, ಸಾ೦ತಾಕ್ಲೊಸ್ ಆಯ್ಲಾ!” ಕ್ರಿಸ್‌ಮಸ್ ಟ್ರೀ ಸರ್‍ಶಿ೦ ಆಸ್‌ಲ್ಲೊ ಭುರ್‍ಗ್ಯಾ೦ಚೊ ಜಮೊ ಖಿಣಾ ಭಿತರ್ ಫಾಸಾಳ್ಳೊ ಆನಿ ಸಿಸ್ಟರಾಚೆ ಮುಕೇಲ್ಪಣಾಖಾಲ್ ಗೇಟಿ ಸರ್‍ಶಿ೦ ಆಯ್ಲೊ.
ತಾಣೆ ಉಸ್ವಾಸ್ ಬಾ೦ದ್ಲೊ, ಉತ್ರಾ೦ ವಿ೦ಚ್ಲಿ೦.
“ಮೆರ್ರಿ ಕ್ರಿಸ್‌ಮಸ್, ಸಿಸ್ಟರ್!” ತೊ ಗೇಟಿಚ್ಯಾ ಸರಳಾ೦ಕ್ ಉಮ್ಕಳ್ಳೊ. “ಇಲ್ಲೊಸೊ ತಡವ್ ಜಾಲೊ, ಹಾ೦ವ್...”
“ಕೋಣ್ ತು೦?” ಸಿಸ್ಟರಾಚೊ ತಾಳೊ ಜಾವ್ನಾಸ್‌ಲ್ಲೊ ಗ೦ಭೀರ್ ಪುಣ್ ಸ್ಪಶ್ಟ್. “ಹಾ೦ಗಾಸರ್ ಕಸೊ ಪಾವ್ಲೊಯ್?”
“ಹಾ೦ವ್ ಸಾ೦ತಾಕ್ಲೊಸ್!”
“ತೆ೦ ಹಾ೦ವ್ ಪಳೆತ್ತ್ ಆಸಾ೦!” ತಿ ಮ್ಹಣಾಲಿ ತಾಚೆರ್ ಎಕ್ ತೀಕ್ ದೀಶ್ಟ್ ಚರವ್ನ್. “ಪುಣ್ ತುಕಾ ಹಾ೦ಗಾಸರ್ ಕೊಣೆ ಧಾಡ್ಲಾ?”
“ಅನಾಥಾಶ್ರಮಾ೦ತ್ಲ್ಯಾ ಭುರ್‍ಗ್ಯಾ೦ಕ್ ಖುಶ್ ಕರ್‍ಚೆ ಖಾತಿರ್ ಎಕಾ ಸಾ೦ತಾಕ್ಲೊಸಾಕ್ ಧಾಡ್ಚೆ ಧರ್‍ಮಿಶ್ಟ್ ಹ್ಯಾ ಶೆರಾ೦ತ್ ಕಾ೦ಯ್ ಉಣೆನಾ೦ತ್, ಸಿಸ್ಟರ್!”
“ತುಜೊ ತಾಳೊ ಆನಿ ಜಿನೊಸ್ ಕಿತ್ಯಾಕ್ ಕಾ೦ಪ್ತಾ?”
“ನತಾಲಾ೦ಚೆ ಗಡ್ದೆ೦ತ್ ಎಕ್ ಲ್ಹಾನ್ ಅವ್ಗಡ್ ಮ್ಹಾಕಾ ಘಡ್ಲೆ೦!” ತೊ ಮ್ಹಣಾಲೊ, ಆಪ್ಲ್ಯಾ ಜಾ೦ಗ್ಳಾಕ್ ದಾಕವ್ನ್. ಆನಿ ಲಿಪವ್ನ್ ಕಸಲೊಯಿ ಫಾಯ್ದೊ ನಾತ್‌ಲ್ಲೊ. “ರಗ್ತಾಸ್ರಾವ್ ಕಠಿಣ್ ಆಸಾ ಪುಣ್ ಭುರ್‍ಗ್ಯಾ೦ಕ್ ನಿರಾಶಿ ಕರು೦ಕ್ ನಜೊ ಮ್ಹಳ್ಳೆ ಖಾತಿರ್...”
“ತುಜಿ ಕಾಣಿ ಪಾತ್ಯೆ೦ವ್ಕ್ ಅಮ್ಕಾ೦ ಕಶ್ಟ್ ಮಾರ್ತಾತ್!” ಸಿಸ್ಟರ್ ಮ್ಹಣಾಲಿ. “ಸಾ೦ತಾಕ್ಲೊಸ್ ಸರ್‍ವಾ೦ಕ್ ಪರಿಚಿತ್ ಜಾವ್ನಾಸ್ಯೆತ್ ಪುಣ್ ತು೦ ಆಮ್ಕಾ೦ ಅಪರಿಚಿತ್. ತುಕಾ ಆಮಿ ಕಸೊ ಭಿತರ್ ಸೊಡ್ಚೊ?”
ತಾಚೆಲಾಗಿ೦ ಕಸಲಿ೦ಯಿ ಉತ್ರಾ೦ ನಾತ್‌ಲ್ಲಿ೦ ಆನಿ ತೊ ಸಲ್ವೊನ್ ವೆಚೆ ಸ್ಥಿತಿಯೆರ್ ಉಬೊ ಜಾತಾನಾ ಭುರ್‍ಗ್ಯಾ೦ನಿ ತಾಚ್ಯಾ ಪಾಡ್ತಿ೦ತ್ ಸಳ್ ಧರ್‍ಲೆ೦ಚ್. “ಪ್ಲೀಜ್, ಸಿಸ್ಟರ್!” ತಿ೦ ಮ್ಹಣಾಲಿ೦. “ಸಾ೦ತಾಕ್ಲೊಸ್ ಭಿತರ್ ಯೆ೦ವ್ದಿ. ಹ್ಯಾ ಪಾವ್ಟಿ೦ ತೊ ಯೆ೦ವ್ಚೊಚ್‌ನಾ ಮ್ಹಣ್ ತು೦ವೆ೦ ಮ್ಹಳ್ಳೆ೦ಯ್ ತರಿ ಬೇಬಿ ಜೀಸಸಾನ್೦ಚ್ ತಾಕಾ ಹಾ೦ಗಾಸರ್ ಧಾಡ್ಲಾ. ಆಮ್ಚ್ಯಾ ವನೆಸ್ಸಾಕ್ ಕಿತ್ಲೊ ಸ೦ತೊಸ್ ಜಾತೊಲೊ!”
ಸಿಸ್ಟರಾನ್ ಭುರ್‍ಗ್ಯಾ೦ಚೆರ್ ದೀಶ್ಟ್ ಚರಯ್ಲಿ ಆನಿ ದೊಗಾ೦ ತೆಗಾ೦ಚಿ೦ ಮಾತಿ೦ ಪೊಶೆಲಿ೦. “ವನೆಸ್ಸಾ!” ತಿ ಮ್ಹಣಾಲಿ ಎಕಾ ಲಾ೦ಬ್ ಉಸ್ವಾಸಾಸ೦ಗಿ. “ಆಮ್ಚೆ೦ ವನೆಸ್ಸಾ.” ಉಪ್ರಾ೦ತ್ ದಿಗ೦ತಾಕ್ ತಿ ಪಳೆಲಾಗ್ಲಿ, ಕಸಲ್ಯಾಗಿ ಸ೦ದೇಶಾಚೆ ನಿರೀಕ್ಶಣ್ ಆಸ್‌ಲ್ಲೆಪರಿ೦.
“ಹ್ಯಾ ಪಾವ್ಟಿ೦ ಯೆ೦ವ್ಚೊ ಸಾ೦ತಾಕ್ಲೊಸ್ ಆಪ್ಲ್ಯಾ ಡೆಡಿಕ್ ಸಾ೦ಗಾತಾ ಘೆವ್ನ್ ಯೆತೊಲೊ ಮ್ಹಣ್ ವನೆಸ್ಸಾ ಆಶೆವ್ನ್ ಆಸಾ!” ತಿ ಮ್ಹಣಾಲಿ ಆಪ್ಲಿ ದೀಶ್ಟ್ ದೆ೦ವಯ್‌ನಾಸ್ತಾ೦. “ಚಡ್ ವೇಳ್ ತಾಚೆ ತಾಬೆ೦ತ್ ನಾ, ಮಿಸ್ಟರ್! ಹ್ಯಾ ಪಾವ್ಟಿ೦, ಇತ್ಲೊ ತಡವ್ ಜಾತಾನಾ, ಆಮಿ ಚಿ೦ತ್ಲೆ೦ ಖ೦ಚಾಯಿ ಧರ್‍ಮಿಶ್ಟಾನ್ ಎಕಾ ಸಾ೦ತಾಕ್ಲೊಸಾಕ್ ಹಾ೦ಗಾಸರ್ ಧಾಡ್ಚಿ ಕೃಪಾ ಕೆಲಿನಾ ಮ್ಹಣ್. ಪುಣ್ ಆತಾ೦ ಆವ್ಚಿತ್....”
“ವನೆಸ್ಸಾಚೊ ಡೆಡಿ ಜಾ೦ವ್ಕ್‌ಯಿ ಹಾ೦ವ್ ತಯಾರ್!” ಖರಿ ಸ೦ಗತ್ ಕಸಲಿ ಮ್ಹಣ್ ಕಳಿತ್ ನಾತ್‌ಲ್ಲಿ ತರಿ ತೊ ಉಲಯ್ಲೊ. ತಾಚ್ಯಾ ಕುಡಿ೦ತ್ಲೆ೦ ತ್ರಾಣ್ ಇರೊನ್ ವೆತಾಲೆ೦; ಪ್ರಥಮ್ ಚಿಕಿತ್ಸಾ ತಾಚಿ ತುರ್‍ತಾಚಿ ಗರ್‍ಜ್ ಜಾವ್ನಾಸ್‌ಲ್ಲಿ. ಸಿಸ್ಟರಾನ್ ಕಿತೆ೦ಯಿ ಮ್ಹಣ್ಚ್ಯಾ ಪಯ್ಲೆ೦ಚ್ ಭಿತರ್‌ಥಾವ್ನ್ ಆನ್‌ಯೆಕ್ ಮಾದ್ರ್, ತರ್‍ನಾಟಿ ಆನಿ ಲವ್‌ಲವೀತ್, ದರ್‍ವಡ್ಯಾನ್ ಧಾ೦ವೊನ್ ಆಯ್ಲಿ.
“ಸಿಸ್ಟರ್, ಸಿಸ್ಟರ್!” ತಿ ಮ್ಹಣಾಲಿ, ಖರ್ಶೆವ್ಣೆ ಸ೦ಗಿ೦. “ವನೆಸ್ಸಾ ಆಮ್ಚ್ಯಾ ಹಾತಾ೦ತ್ಲೆ೦ ಚುಕೊನ್ ವೆತಾ. ಕ್ರಿಸ್‌ಮಸ್ ಟ್ರೀ-ಚ್ಯಾ ಮುಳಾ೦ತ್ ಆಪ್ಣಾಕ್ ವ್ಹರಾ ಮ್ಹಣ್ ಹಟಾಕ್ ಪಡ್ಲಾ೦. ಆಪ್ಲ್ಯಾ ಡೆಡಿಕ್ ಘೆವ್ನ್ ಸಾ೦ತಾಕ್ಲೊಸ್ ಯೆ೦ವ್ಕ್ ನಾ-೦ಗಿ ಮ್ಹಣ್ ವಿಚಾರ್ತಾ. ತುಮಿ೦ ಹಾ೦ಗಾಸರ್......” ಯೆಕಾಚಾಣೆ ತಿಚಿ ದೀಶ್ಟ್ ತಾಚೆರ್ ಪಡ್ಲಿ.
“ಹಾ೦ಗಾಸರ್ ಎಕ್ಲೊ ಮಾನೆಸ್ತ್ ಸಾ೦ತಾಕ್ಲೊಸಾಚ್ಯಾ ಲಿಬಾಸಾಚೆರ್ ಆಯ್ಲಾ. ಅವ್ಗಡಾ೦ತ್ ತಾಚೆ ಜಾ೦ಗೆಕ್ ಘಾಯ್ ಜಾಲಾ ಖ೦ಯ್. ಪುಣ್ ತಾಚಿ ಕಾಣಿ ಕಿತ್ಲಿ ಸತ್, ಕಿತ್ಲಿ ಫಟ್ ತೆ೦ ದೇವ್‌ಚ್ ಜಾಣಾ೦. ಪುಣ್ ವನೆಸ್ಸಾ...ಇತ್ಲ್ಯೆ ವೆಗ್ಗಿ೦?”
ತರ್‍ನಾಟಿ ಮಾದ್ರ್ ತಿಚ್ಯಾ ಕಾನಾ೦ತ್ ಕಿತೆ೦ಗಿ ಪುಸ್ಪುಸ್ಲಿ. ತಿಚಿ೦ ಉತ್ರಾ೦ ಆಯ್ಕೊನ್ ವ್ಹಡಿಲ್ನ್ ಮಾದ್ರಿನ್ ತಾಚೆರ್ ತೀಕ್ಶ್ಣ್ ದೀಶ್ಟ್ ಚರಯ್ಲಿ. “ತು೦ ಕೋಣ್ ಮ್ಹಳ್ಳೆ೦ ತೆ೦ ಆತಾ೦ ಆಮ್ಕಾ೦ ಕಳಿತ್ ಆಸಾ!” ತಿ ಮ್ಹಣಾಲಿ ಸ್ಪಶ್ಟ್ ತಾಳ್ಯಾನ್. “ಸ್ಥಳೀಯ್ ರೇಡಿಯೊಚೆರ್ ತುಜೆ೦ ಕರ್‍ತುಬ್ ಪ್ರಸಾರ್ ಜಾಲಾ೦ ಮ್ಹಣ್ ಸಿಶ್ಟರ್ ಮರ್‍ಸಿನ್ ಮ್ಹಾಕಾ ಆತಾ೦ಚೆ ಆತ್ತಾ೦ ಸಾ೦ಗ್ಲೆ೦.”
“ತರ್ ತುಮಿ೦ ಮ್ಹಾಕಾ ವಿಕ್ರಿತ್ ಕರ್‍ತಾತ್?”
“ತೆ೦ ಗರ್‍ಜೆಚೆ೦ ನ್ಹಯ್!” ತಿ ಮ್ಹಣಾಲಿ ಖಚಿತಾಯೆನ್. “ತು೦ ಖ೦ಯ್ಸರಿ ಧಾ೦ವ್ಚೆ ಸ್ಥಿಯೆರ್ ಬಿಲ್ಕುಲ್‌ನಾ೦ಯ್.”
“ಮ್ಹಾಕಾ ಎಕ್ ಅವ್ಕಾಸ್ ಜಾಯ್ ಸಿಸ್ಟರ್...ಹ್ಯಾ ನತಾಲಾ೦ಚಿ ರಾತ್ ಮ್ಹಜ್ಯಾ ಉತ್ರೊಣೆಚಿ ರಾತ್ ಜಾ೦ವ್.”
ತಿಚ್ಯಾ ವೊ೦ಟಾ೦ಚೆರ್ ಎಕ್ ಕ್ಶೀಣ್ ಹಾಸೊ ಉದೆವ್ನ್ ಲಿಪ್ಲೊ. “ಕಸಲಿ೦ಯಿ ತುಜಿ ಸಿ೦ತಿಮೆ೦ತಾ೦ ಜಾ೦ವ್, ಎಕಾ ವಿಶಿಶ್ಟ್ ಉದ್ದೇಶಾನ್ ದೆವಾನ್ ತುಕಾ ಹಾ೦ಗಾಸರ್ ಹಾಡ್ಲಾ ಮ್ಹಣ್ ಹಾ೦ವ್ ಪಾತಿಯೆತಾ೦ ಆನಿ...ಹಾ೦...ನಟನಾಚೆ೦ ಥೊಡೆ೦ ದೆಣೆ ತುಜೆಥ೦ಯ್ ಆಸ್ತೆಲೆ೦ ಮ್ಹಣ್ ಭರ್ವಸ್ತಾ೦.”
“ನಟನಾಚೆ೦ ದೆಣೆ? ಸಿಸ್ಟರ್.......”
“ಆಮ್ಚೆ೦ ವನೆಸ್ಸಾ ವೆಚ್ಯಾರ್ ಆಸಾ! ತಾಚೆ೦ ಅ೦ತ್ಯ್ ಇತ್ಲ್ಯಾವೆಗ್ಗಿ೦ ಯೇತ್ ಮ್ಹಣ್ ಆಮಿ೦ ಚಿ೦ತು೦ಕ್ ನಾ. ಆಪುಣ್ ಮೊರ್‍ಚ್ಯಾ ಪಯ್ಲೆ೦ ಡೆಡಿ ಯೆತೊಲೊ ಮ್ಹಣ್ ತೆ೦ ಆಶೆವ್ನ್ ಆಸಾ. ಹಾ೦ಗಾಸರ್ ತುಜೆ೦ ನಟನ್ ಆಮ್ಕಾ೦ ಗರ್‍ಜೆಚೆ೦...”
“ಪೂಣ್ ಸಿಸ್ಟರ್....”
“ಭಿತರ್ ಯೆ! ತುಕಾ ಪ್ರಥಮ್ ಚಿಕಿತ್ಸಾ ಆನಿ ಫಳಾರ್ ಮೆಳ್ತೊಲೊ. ತುಜಿ೦ ಸಿ೦ತಿಮೆ೦ತಾ೦ ಜಾಗಿ೦ ಕರ್, ಖ೦ಡಿತ್ ಜಾವ್ನ್ ತುಕಾ ಪತಿಣ್ ಆನಿ ಭುರ್‍ಗಿ೦ ಆಸ್ತೆಲಿ೦ಚ್.” ತಿಣೆ ಗೇಟ್ ಉಗ್ತಿ ಕೆಲಿ. ತರ್‍ನಾಟಿ ಮಾದ್ರ್ ಮರ್‍ಸಿ ಕಾವ್ಜೆವ್ನ್ ವ್ಹಡಿಲ್ನಿಚ್ಯಾ ಹಾತಾಕ್ ಧರಿಲಾಗ್ಲಿ. “ಭಿಯೆನಾಕಾ ಧುವೆ!” ಮ್ಹಣಾಲಿ ವ್ಹಡಿಲ್ನ್ ತಿಚೊ ಹಾತ್ ಥಾಪುಡ್ನ್. “ತಾಚ್ಯೊ ವಾಟೊ ವಿಚಿತ್ರ್ ಜಾವ್ನಾಸಾತ್. ಕಸಲೆ೦ಚ್ ಆಯ್ಬ್ ಹ್ಯಾ ಪವಿತ್ರ್ ರಾತಿಚೆರ್ ಆನಿ ಆಮ್ಚೆರ್ ಯೆ೦ವ್ಚೆ೦ ನಾ. ಆತಾ೦ ಹ್ಯಾ ಮಾನೆಸ್ತಾಕ್ ಪಾರ್‍ಲರಾಕ್ ವ್ಹರ್, ಪ್ರಥಮ್ ಚಿಕಿತ್ಸಾ ತಾಕಾ ದಿ; ಹುನೊನಿ ಕಾಫಿಯೆಚಿ ವಿಲೆವಾರಿ ಹಾ೦ವ್ ಕರ್‍ತಾ೦.”
ತೊ ಭಿತರ್ ರಿಗ್ಲೊ.
ತಾಚೆ೦ ಜಾ೦ಗಾಳ್ ದಾ೦ತ್ಯಾ ಫಾತೊರ್ ಬಾ೦ದ್‌ಲ್ಲೆಪರಿ೦ ಜಡ್ ಜಾಲ್ಲೆ೦. ತೊ ಭಿತರ್ ಯೆತೆಚ್ಚ್ ವ್ಹಡಿಲ್ನಿನ್ ಗೇಟ್ ಪರ್‍ತ್ಯಾಬ್ ಬ೦ದ್ ಕೆಲಿ. “ಪಾರ್‍ಲಲಾ ಪರ್‍ಯಾ೦ತ್ ಚಲೊ೦ಕ್ ತುಕಾ ತಾ೦ಕ್ತಾ?”
“ಪ್ರೇತನ್ ಕರ್‍ತಾ೦ ಸಿಸ್ಟರ್!”
ಕೊಣೆ೦ಗಿ ತಾಚೊ ಹಾತ್ ಧರ್‍ಲೊ. “ತು೦ ಸಾ೦ತಾಕ್ಲೊಸ್ ಆಸ್‌ಲ್ಲೊಯ್ ಆತಾ೦ ವನೆಸ್ಸಾಚೊ ಡೆಡಿ ಜಾಲೊಯ್?” ತ್ಯಾ ಲ್ಹಾನ್ ಭುರ್‍ಗ್ಯಾಚೆ೦ ಸವಾಲ್ ತಾಕಾ ಫುಮಾರ್ ಕರಿಲಾಗ್ಲೆ೦.
“ವ್ಹಯ್!” ತೊ ಮ್ಹಣಾಲೊ ತ್ಯಾ ಭುರ್‍ಗ್ಯಾಕ್ ಆರಾವ್ನ್ ಧರುನ್.
“ಯೆ೦ವ್ಚ್ಯಾ ವರ್‍ಸಾ ಮ್ಹಜ್ಯಾ ಡೆಡಿಕ್ ಆಪವ್ನ್ ಹಾಡ್ತಾಯ್?”
“ಆನಿ ಮ್ಹಜೆ ಮಾಮ್ಮಿಕ್?” ಆನ್‌ಯೆಕ್ಲೆ೦ ಭುರ್‍ಗೆ೦ ತಾಚ್ಯಾ ಪಾ೦ಯಾ೦ಕ್ ಉಮ್ಕಳ್ಳೆ೦. “ಆಮಿ ಖ೦ಡಿತ್ ಜಾವ್ನ್ ಬರಿ೦ ಭುರ್‍ಗಿ೦ ಜಾವ್ನ್ ಚಲ್ತೆಲ್ಯಾ೦ವ್.”
ವನೆಸ್ಸಾನ್ ಕಶ್ಟಾ೦ನಿ ದೊಳೆ ಉಗ್ತೆ ದವರ್‍ಲೆ.
“ಲಾಗಿ೦ ಯೆ, ಸಾ೦ತಾಕ್ಲೊಸ್ ! ತೆ೦ ಮ್ಹಣಾಲೆ೦. “ಮ್ಹಜೆಸರ್‍ಶಿ೦ ಬೊಸ್. ತೊ ಖಟ್ಲ್ಯಾಚೆ ಆನ್‌ಯೆಕೆ ದೆಗೆನ್ ಬಸ್ಲೊ.
“ಹಾ೦ವ್ ತುಜೊ...
“ತು೦ ಮ್ಹಜೊ ಹೆ೦ಡ್ಸಮ್ ಡೆಡಿ ನ್ಹಯ್, ಸಾ೦ತಾಕ್ಲೊಸ್ ! ತೆ೦ ಮ್ಹಣಾಲೆ೦, ಹಳ್ಟಾಚಿ ಖರಸ್ ಕಾಡ್ನ್. “ತುಮಿ೦ ಮ್ಹಾಕಾ ಕಿತ್ಯಾಕ್ ಫಟಯ್ತಾತ್, ಸಿಸ್ಟರ್ ?
ವನೆಸ್ಸಾಚ್ಯಾ ಸವಲಾನ್ ತಾ೦ಕಾ೦ ಘಡಿಬರ್ ಸ್ತಬ್ದ್ ಕೆಲೆ೦ಚ್. ದೋನ್ ದುಕಾ೦ ತ್ಯೆ ಚಲಿಯೆಚ್ಯಾ ಪೊಲ್ಯಾ೦ವಯ್ಲ್ಯಾನ್ ದೆ೦ವ್ಲಿ೦.
ತವಳ್ ಸಾ೦ತಾಕ್ಲೊಸಾಚೊ ವೇಸ್ ಘಾಲ್ನ್ ಸ೦ಸಾರಾಕ್ ಆನಿ ಆಪ್ಣಾಕ್‌ಚ್ ಫಟ೦ವ್ಕ್ ಭಾಯ್ರ್ ಸರ್‌ಲ್ಲ್ಯಾ ತಾಚ್ಯಾ ಕಾಳ್ಜಾ೦ತ್ ಕಸಲೆ೦ಗಿ ಸ್ಪೋಟನ್ ಜಾಲೆ೦. ಎಕ್ ನವಿ ಸಕತ್ ತಾಚೆ ಥ೦ಯ್ ಚರ್‍ಲಿ ಆನಿ ಹ್ಯಾ ಸಕ್ತೆಚ್ಯಾ ಬಳಾನ್ ತಾಣೆ ವನೆಸ್ಸಾಚೆ೦ ಮಾತೆ೦ ಆಪ್ಲ್ಯಾ ಹಾತಾ೦ನಿ ಆರಾಯ್ಲೆ೦, ಮೊಗಾನ್ ಆನಿ ನಾಜೂಕಾಯೆನ್.
“ತುಕಾ ಆಮಿ೦ ಫಟಯ್ನಾ೦ವ್, ಪುತಾ ! ತಾಚಿ೦ಚ್ಚ್ ಉತ್ರಾ೦ ತಾಕಾ ಪಯ್ಶಿಲ್ಯಾನ್ ಆಯ್ಕಾಲಿ೦. “ಹಾ೦ವ್ ಮ್ಹಾಕಾಚ್ಚ್ ಫಟಯ್ತಾಲೊ೦ ಪುಣ್ ಆಯ್ಚೆ ರಾತಿ೦ ಮ್ಹಾಕಾ ಎಕಾ ಧುವೆಚಿ ಗರ್‍ಜ್ ಪಡ್ಲಿ. ಆತಾ೦ ತಾಚಿ೦ ದುಕಾ೦ ವನೆಸ್ಸಾಚ್ಯಾ ಪೊಲ್ಯಾ೦ಚೆರ್ ಪಡ್ಟಾಲಿ೦. “ಹ್ಯಾ ಡೆಡಿಕ್ ಎಕಾ ಧುವೆಚಿ ಗರ್‍ಜ್ ಪಡ್ಲಿ. ತೊ ಉಗ್ತ್ಯಾನ್ ಕಸ್ಕಸೋನ್ ರಡ್ಲೊ.
ವನೆಸ್ಸಾನ್ ಆಪ್ಲೆ ಹಾತ್ ಸಿಸ್ಟರ್ ಕಾರ್‍ಮೆಲಿಟಾಚ್ಯಾ ಹಾತಾ೦ತ್ಲೆ ಸುಟಯ್ಲೆ ಆನಿ ತಾಚ್ಯಾ ಹಾತಾ೦ಚೆರ್ ದವರ್‍ಲೆ. “ಪುಣ್ ಹಾ೦ವ್ ವೆಗಿ೦ಚ್ ಮೊರ್‍ಚ್ಯಾರ್ ಆಸಾ೦ ! ತೆ೦ ಮ್ಹಣಾಲೆ೦, ಆತಾ೦ ಚಡೊನ್ ಯೆ೦ವ್ಚ್ಯಾ ಖರ್‍ಶೆವ್ಣೆನ್. “ತುಕಾ ಮ್ಹಜೊ ಉಡಾಸ್ ಪರ್‍ಯಾ೦ತ್ ಉರ್‍ಚೊ ನಾ.
“ಮ್ಹಜೆ೦ ಕಾಳಿಜ್ ಗೂ೦ಡ್ ಆನಿ ವಿಸ್ತಾರ್ ಆಸಾ, ಮ್ಹಜೆ ಧುವೆ ! ತಾಚಿ೦ ಉತ್ರಾ೦ ತಾಕಾ ವಿಸ್ಮಿತ್ ಕರ್‍ತಾಲಿ೦. “ತುಜೊ ಉಡಾಸ್...ಪಳೆ, ಪಳೆ ಹಾ೦ವೆ೦ ತುಕಾ ಕ್ರಿಸ್‌ಮಸ್ ಪ್ರೆಸೆ೦ಟ್ ಹಾಡ್ಲಾ೦. ಆಪ್ಲ್ಯಾ ದಗ್ಲ್ಯಾಚ್ಯಾ ಬಲ್ಸಾ೦ತ್ ಸಾಸ್ಪುನ್ ತಾಣೆ ವಜ್ರಾ೦ಚೊ ನೆಕ್ಲೆಸ್ ಭಾಯ್ರ್ ಕಾಡ್ಲೊ ಆನಿ ವನೆಸ್ಸಾ ಸಾಮ್ಕಾರ್ ಧರ್‍ಲೊ.
ಮೊಧ್ಯಾನ್ ರಾತ್, ನಿಧಾನ್ ರಾತ್, ನೆಕೆತ್ರಾ೦ ಜಿಳ್ಮಿಳ್ತಾತ್.
ಪಯ್ಶಿಲ್ಯಾನ್ ಕ೦ತಾರ್ ಆಯ್ಕಾತಾಲೆ೦.
“ವೆಗಿ೦ಚ್ ಹಾ೦ವ್ ನೆಕೆತ್ರಾ೦ ಮಧೆ೦ಚ್ ನಿದ್ತೆಲಿ೦ ! ತೆ೦ ಮ್ಹಣಾಲೆ೦. “ವಜ್ರಾ೦ಚೊ ನೆಕ್ಲೆಸ್ ಮ್ಹಾಕಾ ಕಸಲ್ಯಾ ಫಾಯ್ದ್ಯಾಚೊ ? ತಾಣೆ ಆಪ್ಲ್ಯಾ ಪೊಲ್ಯಾ೦ ವಯ್ಲಿ೦ ದುಕಾ೦ ಪುಸ್ಲಿ೦. “ಪುಣ್ ತುಜಿ ಖುಶಿ ತರ್ ಹೊ ನೆಕ್ಲೆಸ್ ಘಾಲು೦ಕ್ ಹಾ೦ವ್ ತಯಾರ್ ಆಸಾ೦.
“ಮ್ಹಾಕಾ ಕಿತೆ೦ ಮ್ಹಣ್ಚೆ೦ ಮ್ಹಣ್ ಸಮ್ಜಾನಾ, ಪುತಾ !
“ಮೊಧ್ಯಾನೆಕ್ ಆನಿ ಕಿತ್ಲೊ ವೇಳ್ ಬಾಕಿ ಆಸಾ ?
“ಪಾ೦ಚ್‌ಚ್ಚ್ ಮಿನುಟಾ೦ ಬಾಕಿ ಆಸಾತ್, ವನೆಸ್ಸಾ ! ಮ್ಹಣಾಲಿ ಸಿಸ್ಟರ್ ಕಾರ್‍ಮೆಲಿಟಾ. “ಬಾಳೊಕಾಕ್ ಖಾವಣೆ೦ತ್ ನಿದಾ೦ವ್ಕ್ ತುಕಾ ತಾ೦ಕಾತ್ ?
ತೆ೦ ಸ್ವಾಧೀಕ್ ಹಾಸೊ ಹಾಸ್ಲೆ೦.
“ಪಾ೦ಚ್ ಮಿನುಟಾ೦ಬರ್, ಬೇಬಿ ಜೀಜಸ್ ಜಲ್ಮೊಚೆ ಪಯ್ಲೆ೦, ಹಾ೦ವೆ೦ ಖಾವಣೆ೦ತ್ ನಿದ್ಯೆತ್, ಸಿಸ್ತರ್ ?
ಹೆ೦ ಆಯ್ಕೊನ್ ಸಿಸ್ಟರ್ ಕಾರ್‍ಮೆಲಿಟಾ ಉಗ್ತ್ಯಾನ್ ರಡೊನ್ ಭಾಯ್ರ್ ಧಾ೦ವ್ಲಿ.
“ಫಕತ್ ಪಾ೦ಚ್ ಮಿನುಟಾ೦ಬರ್ ! ವನೆಸ್ಸಾನ್ ಹಾತ್ ಉಭಾರೊನ್ ಧರ್‍ಲೆ. “ಪಾ೦ಚ್ಚ್ ಮಿನುಟಾ೦ !
ವಜ್ರಾ೦ಚೊ ನೆಕ್ಲೆಸ್ ಖಟ್ಲ್ಯಾರ್‌ಚ್ ಗಳವ್ನ್ ತಾಣೆ ವನೆಸ್ಸಾಕ್ ಆಪ್ಲ್ಯಾ ಹಾತಾ೦ನಿ ಆರಾಯ್ಲೆ೦ ಆನಿ ಎಕಾ ಊಬ್ ಕಾ೦ಬ್ಳಿ೦ತ್ ತಾಕಾ ರೆವ್ಡಾವ್ನ್ ತೊ ಭಾಯ್ರ್ ಹಾಡುನ್ ಆಯ್ಲೊ. ತಾಚಿ ಮೋತ್ ಸಾಫ್ ಜಾಲ್ಲಿ ; ದುಕಿಚಿ ತಾಕಾ ಆತಾ೦ ಪರ್‍ವಾನಾತ್‌ಲ್ಲಿ.
ತಾಚಿ ಉತ್ರೊಣ್ ಪೂರ್‍ಣ್ ಜಾ೦ವ್ಚ್ಯಾರ್ ಆಸ್‌ಲ್ಲಿ.
ರಿತ್ಯಾ ಖಾವಣೆ೦ತ್ ನಿದಾಯ್ತಾನಾ ವನೆಸ್ಸಾಚೆ ಬಾವ್ಳೆ ತಾಚ್ಯಾ ಗೊಮ್ಟ್ಯಾಕ್ ಉಮ್ಕಳೋನ್ ರಾವ್ಲೆ ಪುಣ್ ಥೊಡ್ಯಾಚ್ ಖಿಣಾ೦ಕ್.
“ಮೆರ್ರಿ ಕ್ರಿಸ್‌ಮಸ್, ಡೆಡಿ ! ತಾಚೊ ವೆಡ್ಕೊಳ್ ನಿಸರ್‍ಲ್ಯಾ ಉಪ್ರಾ೦ತ್‌ಯಿ ತಾಚಿ೦ ಹಿ೦ ಉತ್ರಾ೦ ನೆಕೆತ್ರಾ೦ಪರಿ೦ ತ್ಯಾ ಗರ್‍ದನಾಚ್ಯಾ ಗೊಟ್ಯಾ೦ತ್ ಉಮ್ಕಳೋನ್ ಉರ್ಲಿ೦.
Tags:
Edwin JF Dsouza, Konkani Story, Konkani, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/24/2020 ಉದೆಂತಿಚೆಂ ನೆಕೆತ್ರ್...
-
11/28/2020 ಚೂಕಿ ತಿದ್ವಿನಾ ಜಾಲ್ಯಾರ್!...
-
11/4/2020 ಅನಿವಾಸಿ ರಾಯ್...
-
10/23/2020 ಘಾಣ್...
-
-
9/13/2020 ರಾತ್ ಪಾಳಿ...
-
6/18/2018 ವೆಚಿಕ್ ಪುತಾಚೊ ದಾಟ್ಟು...
-
11/12/2017 ನ್ಯೂ ಐನ್‌ಸ್ಟೀನ್...
-
9/7/2017 ಮ್ಹಜ್ಯಾ ಮೊಗಾಚೆಂ ಮೆಲ್ಬಾ...
-
8/29/2017 ಕೊಲ್‍ಗರ್ಲ್...
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
Our Address
Mangalore
 | Contact Person : Mr. Praveen Tauro |
Email : praveen@maibhaas.com
Phone : +91 99 80 184340
Address :
Daijiworld.com,
Airport Road,
opp. Bondel Church,
Mangalore - 575 008
Karnataka - India
Our Address
Udupi
 | Contact Person : Mr. Joel D'almeida |
Email : joel@maibhaas.com
Phone : +91 90 08 855392
Address :
Eventz Redefined,
Next to Vijaya Bank,
Holy Family Complex
1st Floor, NH -66
Brahmavara - 576213
Our Address
Dubai
 | Contact Person : Mr. Naveen Sequeira |
Email : editor@maibhaas.com
Phone : +97 150 755 4105
Address :
Master Mind IT Solutions,
UBL Building,
#402, 4th Floor
Bank Street - Bur Dubai
Dubai - UAE
0 Comment/s.